Bewaring

Olienhout Bewusmaking & Bewarings Projek

Die Vredefortkoepel by Parys, word tans as die grootste en oudste sigbare impak-struktuur van die aarde se 175 bekende impakkraters beskou. Dit is hier waar ons ook een van die grootste konsentrasies van natuurlike olienhout kry.
Daarom maak dit die koepel en nabye omgewing 'n belangrike area vir bewaring en asook die rede vir die Olienhout-tak se naam en kenteken.

Olienhout (Olea europaea subspesie cuspidata) - deel van die Oleaceae famielie - is 'n boom wat wydverspreid in Suid-Afrika voorkom. Dit is 'n middelgroot boom en word tot 18 m hoog. Die blare is enkelvoudig en teenoorstaande en is glansend groen aan die bokant en silwerig, goud of bruin aan die onderkant. Die vrugte word tot 10 mm lank en word swart wanneer ryp. Hulle is eetbaar maar bitter. Die boom is gehard en groei goed in droë gebiede en het min water nodig.

Die Olienhout-tak beoog om die publiek en natuur liefhebbers te betrek en meer kennis oor te dra oor die olienhout en die koepel deur middel van inligtingsdae en werkswinkels.